Դսեղ գյուղում ամփոփվեց բնապահպանական թեմայով մրցույթը

Ապրիլի 21-ին Լոռու մարզի Դսեղ գյուղի մշակույթի տան դահլիճում տեղի ունեցավ ՀԿ Կենտրոնի կողմից հայտարարված  «Մեր գյուղը և բնությունը» խորագրով շարադրությունների և նկարների բնապահպանական մրցույթի ամփոփիչ միջոցառումը:

Նախքան մրցույթի արդյունքների ամփոփումը Դսեղ գյուղի երեխաները Դսեղի միջնակարգ դպրոցի փոխտնօրեն Նունե Բեժանյանի նախաձեռնությամբ պատրաստել էին տեղեկատվական-գեղարվեստական  միջոցառում, որը ներկայացրեցին համայնքի բնակիչներին: Միջոցառման ընթացքում երեխաներն անդրադարձան բնապահպանական խնդիրներին, իրենց համայնքի բնության գեղեցկությանը և դրա  պահպանման կարևորությանը:

Միջոցառումից հետո ողջույնի խոսքով հանդես եկավ ՀԿ Կենտրոնի «Ֆինանսական մասնակցային մոտեցման իրականացում՝ Հայաստանում սոցիալ-տնտեսական զարգացման համար» ծրագրի  Լոռու մարզային  համակարգող Սյուզան Հովսեփյանը՝ անդրադառնալով ծրագրի նպատակին, ընթացքին, հետագա քայլերին, մրցույթի անցկացման և ընտրության ընթացակարգին:

Մրցույթին մասնակցել են 6-18 տարեկան երեխաներ՝ շուրջ 40 աշխատանքներով: Աշխատանքների գնահատումն իրականացվել է անկախ ժյուրիի կողմից: Գնահատման գործընթացում անաչառության սկզբունքը պահպանելու համար ժյուրիի անդամներին աշխատանքները հանձնվել են անանուն և կոդավորված։

Միջոցառման երկրորդ մասում երեխաներին հնարավորություն տրվեց ներկայացնել իրենց աշխատանքների հիմքում ընկած գաղափարը, ասելիքը, որից հետո տեղում կատարվեց վերջնական ընտրությունը և մրցանակային տեղերի բաշխումը:  Նախնական գնահատման արդյունքներին գումարվեցին գաղափարի ներկայացման համար ժյուրիի կողմից տրված միավորները:  Արդյունքում ժյուրիի որոշմամբ բոլոր մասնակից երեխաները ստացան դրամական մրցանակներ և հավաստագեր:

 

Մրցույթի ամփոփմամբ հայտարարվեցին հաղթող երեխաները։ Դսեղ գյուղում ֆինանսական մրցականներ ստացան 20 երեխաներ, որոնցից չորսն առաջին, հինգը երկրորդ և 11-ն երրորդ տեղի համար։ Իսկ մյուս մասնակից երեխաները ստացան խրախուսական նվերներ։

 

 

Սույն մրցույթն իրականացվում է «Էկոմիջանցքների խթանում Հարավային Կովկասում-II» ծրագրի շրջանակներում իրականացվող «Ֆինանսական մասնակցային մոտեցման իրականացում՝ Հայաստանում սոցիալ-տնտեսական զարգացման համար» բաղադրիչի շրջանակներում։