«Քաղաքացիական հասարակություն. կազմակերպում, կառավարում և զարգացում» դասընթացի նպատակն է ուսանողներին տեսական և կիրառական խորացված գիտելիքներ հաղորդել քաղաքացիական հասարակության պատմության, քաղաքացիական հասարակության կազմակերպությունների գործառնական նշանակության, կազմակերպական կառավարման ու հասարակության զարգացման համատեքստում դրանց ազդեցության վերաբերյալ՝ ծանոթացնելով քաղաքացիական հասարակության կազմակերպությունների որդեգրած գործառնական և ծրագրային մոդելներին և դրանց կառավարման հնարավորություններին:
Դասընթացի ավարտին ուսանողը կունենա.
ա. մասնագիտական գիտելիք և իմացություն՝
- ներկայացնելու քաղաքացիական հասարակության սահմանումները.
- գիտակցելու և նկարագրելու քաղաքացիական հասարակության կազմակերպությունների զարգացող դերը միջազգային տարբեր ոլորտներում.
- թվարկելու քաղաքացիական հասարակության կազմակերպություններին վերաբերող միջազգային համաձայնագրերը, կարգավորումներն ու ազգային օրենքները.
- ներկայացնելու քաղաքացիական հասարակության առանցքային դերերը.
- նկարագրելու քաղաքացիական հասարակության կազմակերպությունների հաշվետվողականության գործիքներն ու մեխանիզմները.
- ըմբռնելու քաղաքացիական հասարակության և պետության փոխհարաբերման առանձնահատկությունները.
- ընկալելու քաղաքացիական հասարակության և ժողովրդավարության փոխազդեցությունը.
- ճանաչելու քաղաքացիական հասարակության կազմակերպությունների ղեկավարման մոդելներն ու միջազգային միտումները.
- ճանաչելու և ներկայացնելու առաքելության վրա հիմնված կառավարման սկզբունքներն ու ոչ առևտրային հատվածի կառավարման մոդելները.
- նկարագրելու քաղաքացիական հասարակության կազմակերպությունների ծրագրային կառավարման շրջանակը:
բ. գործնական մասնագիտական կարողություններ՝
- տարանջատելու քաղաքացիական հասարակության կազմակերպությունների գործառույթները.
- վերլուծելու քաղաքացիական հասարակության կազմակերպությունների դերակատարումը հանրային քաղաքականության մշակման և իրականացման գործում.
- մեկնաբանելու քաղաքացիական հասարակության կազմակերպությունների կառուցվածքի, գործառույթների և կարգավիճակի մասին տեսական և հայեցակարգային արդիական մոտեցումները, քաղաքացիական հասարակության կազմակերպության մոդելային առանձնահատկություններն ու հիմնական հատկանիշները.
- տարանջատելու առաջնորդության ժամանակակից մոդելների վրա հիմնված ղեկավարման տեսակները.
- արժևորելու քաղաքացիական հասարակության ազդեցությունը սոցիալական հարաբերությունների վրա.
- մեկնաբանելու սոցիալական պատասխանատվության հիմնահարցերը քաղաքացիական հասարակության հատվածի դիտակետից.
- համեմատելու և տարբերակելու դերակատարների ազդեցությունը հասարակության զարգացման համատեքստում.
- մշակելու առաջարկություններ երեք հատվածների արդյունավետ համագործակցության մոդելների վերաբերյալ:
գ. ընդհանրական/փոխանցելի կարողություններ՝
- նախապատրաստելու ներկայացում, զեկուցելու.
- մասնակցելու խմբային քննարկումներին՝ հիմնավորելով դիրքորոշումները.
- գրելու վերլուծական աշխատանք՝ էսսե.
- վերլուծելու գրականություն, փաստեր և հետևություններ անելու,
- ստեղծագործաբար կիրառելու և զարգացնելու գիտելիքները:
Դասընթացը բաղկացած է հետևյալ չորս հիմնական բաժիններից՝
- Քաղաքացիական հասարակության ձևավորման պատմությունն ու կարևորությունը
- Քաղաքացիական հասարակության դերը (առանցքային և բազմազանեցված դերեր)
- ՔՀԿ-ների դերն ու ազդեցությունը ՀՀ-ում
- Քաղաքացիական հասարակության կազմակերպությունների որդեգրած գործառնական և ծրագրային մոդելները
«Քաղաքացիական Հասարակություն» ակադեմիական կրթության մոդուլը պատրաստվում է Եվրոպական միության ֆինանսական աջակցությամբ՝ STRIVE ծրագրի շրջանակներում: Բովանդակության համար պատասխանատվություն է կրում «ՀԿ Կենտրոն» քաղաքացիական հասարակության զարգացման ՀԿ-ն, և պարտադիր չէ, որ այն արտահայտի Եվրոպական միության տեսակետները։ STRIVE ծրագիրն իրականացնում է ՆԵՖ Բելգիան (NEF Belgium)՝ համագործակցությամբ չորս գործընկեր կազմակերպությունների. «Ագաթ» հաշմանդամություն ունեցող կանանց իրավունքների պաշտպանության կենտրոն ՀԿ, «ԲԼԵՋԱՆ» բնապահպանական, սոցիալական, բիզնեսի աջակցության ՀԿ, «ՎԻՆՆԵԹ Գորիս» զարգացման հիմնադրամ և «Դիլիջանի երիտասարդների համագործակցության կենտրոն» ՀԿ: