2024 թվականի նոյեմբերին «ՀԿ Կենտրոն» քաղաքացիական հասարակության զարգացման ՀԿ-ն իրականացրեց ներքին բազմապատկման դասընթացների շարք «DeSIRe» ծրագրի շրջանակում։
Դասընթացների նպատակն էր զարգացնել երիտասարդների, ուսուցիչների և քաղաքացիական հասարակության ներկայացուցիչների փափուկ հմտությունները, որոնք կարևոր են ժամանակակից աշխատաշուկայի և համայնքային զարգացման համար։
Դասընթացները վարեցին փորձառու մասնագետներ Սյուզան Հովսեփյանը և Վահե Խաչիկյանը։ Դասընթացներն ընդգրկում էին չորս հիմնական թեմատիկ ուղղություններ՝ մեդիա և թվային գրագիտություն, հավասարություն, բազմազանություն և ներառում, սոցիալական ձեռնարկատիրություն և նախաձեռնողականություն, ինչպես նաև վերլուծական մտածողություն և գնահատման հմտություններ։
Ութ ինտերակտիվ սեսիաների ընթացքում ավելի քան 330 մասնակից ձեռք բերեցին գործնական գիտելիքներ և հմտություններ, որոնք ուղղված էին սոցիալական նորարարության խթանմանը, ներառական միջավայրերի ձևավորմանը և կայուն զարգացման գաղափարների իրականացմանը։ Դասընթացները համակցում էին տեսական գիտելիքները գործնական վարժությունների, խմբային քննարկումների և գործողությունների պլանավորման հետ՝ ապահովելով անմիջական կիրառելիություն։
Մասնակիցները նշեցին, որ դասընթացները ոչ միայն բարձրացրել են իրենց գիտելիքների մակարդակը, այլև նրանց տրամադրվել են գործիքներ, որոնք պատրաստ են կիրառել իրենց աշխատանքում, ուսման և համայնքային գործունեության մեջ։ Շատերը պատրաստակամություն են հայտնել մասնակցել խորացված դասընթացների՝ սոցիալական ձեռնարկատիրության, մեդիա գրագիտության և ներառական կրթության թեմաներով։
Այս նախաձեռնությունը նպաստեց անհատական կարողությունների զարգացմանը և ամրապնդեց կրթական հաստատությունների ու ՀԿ-ների ներուժը՝ ապահովելով երկարաժամկետ ազդեցություն կրթության որակի, քաղաքացիական ներգրավվածության և համայնքային կայուն զարգացման վրա։
Եվրոպական Միության ԷՐԱԶՄՈՒՍ+ԾՐԱԳՐԻ ՀԳ2 ԿԶԲԿ «Հայաստանի և Վրաստանի բուհերում 21-րդ դարի աշխատաշուկայի պահանջներին համահունչ ճկուն հմտությունների զարգացում» (DeSIRe) նախագիծն առաջնորդվում է Վանաձորի Հ․ Թումանյանի անվան պետական համալսարանի կողմից և իրականացվում է Հայաստանի, Վրաստանի և Եվրոպական միության անդամ երկրների գործընկեր բարձրագույն ուսումնական հաստատությունների, ինչպես նաև «ՀԿ Կենտրոն» քաղաքացիական հասարակության զարգացման ՀԿ-ի հետ համատեղ։
Նախագիծն ունի նաև 3 ասոցացված գործընկեր կառույցներ։