
Գերմանական միջազգային համագործակցության ընկերության (GIZ) հանձնարարությամբ «ՀԿ Կենտրոն» քաղաքացիական հասարակության զարգացման ՀԿ-ն համագործակցելով Արմավիրի զարգացման կենտրոնի հետ մարտ ամսվա ընթացքում Հայաստանի 10 բազմաբնակավայր համայնքներում ամփոփեց նախորդ ամիսներին իրականացված մարդակենտրոն ծառայությունների նախագծման աշխատանքների քննարկումը՝ նախատիպերի վալիդացման հանդիպմամբ։
Հանդիպումների հիմնական նպատակն էր ամփոփել մարդակենտրոն համայնքային ծառայությունների նախագծման գործընթացը՝ հնարավորություն տալով բնակիչներին ներգրավվելու իրենց համայնքների զարգացմանը։
Համայնքներում մարդակենտրոն ծառայությունները ընդգրկում էին հանրային տրանսպորտի, երեխաների և երիտասարդների կրթության ու զարգացման հնարավորությունների, համայնքային մշակութային կյանքի որակի բարելավման և հանրային տարածքների արդյունավետ նախագծման գաղափարներ։
Այս հանդիպումներին մասնակցեցին տեղացի և Լեռնային Ղարաբաղից բռնի տեղահանված բնակիչներ, ՏԻՄ ներկայացուցիչներ և այլ շահագրգիռ կողմեր: Արդյունքում քննարկումներին ներգրավված էին շուրջ 221 բնակիչներ, որոնցից 33-ը ԼՂ-ից բռնի տեղահանվածներ էին
Քննարկումների ընթացքում քաղաքացիները նշեցին, որ նման հանդիպումները կարևոր են համայնքային խնդիրների լուծման համար, քանի որ դրանք հնարավորություն են տալիս լսելի դարձնել իրենց կարծիքը և համատեղ մշակել արդյունավետ լուծումներ։Մասնակիցները վստահություն հայտնեցին, որ այս ծառայությունները կնպաստեն համայնքների կայուն զարգացմանը և բնակիչների կյանքի որակի բարձրացմանը։
Սույն նախաձեռնությունն իրականացվում է «Լավ կառավարում հանուն տեղական զարգացման Հարավային Կովկասում» ծրագրի շրջանակում՝ Գերմանիայի կառավարության և Հայաստանում՝ Շվեյցարիայի զարգացման և համագործակցության գործակալության (SDC) համաֆինանսավորմամբ, «ՀԿ Կենտրոն» քաղաքացիական հասարակության զարգացման ՀԿ-ի կողմից` Գերմանական միջազգային համագործակցության ընկերություն (GIZ) հանձնարարությամբ: